Willie Wastle by Robert Burns
by Submitted by Alex Guithrie
Willie Waslte dwalt on Tweed,
The spot they ca'ad it Linkumdoddie.
Willie was a wabster guid
Could stown a clue wi onie body.
He had a wife was dour and din,
O, Tinkler Maidgie was her mither!
Sic a wife as Willie had,
I wad na gie a button for her.
She has an e'e she has but ane,
The cat has twa the very colour,
five rusty teeth, forbye a stump,
A clapper-tongue wad deave a miller;
A whiskin beard about her mou,
Her nose and chin they threaten ither:
Sic a wife as Willie had,
I wad na gie a button for her.
She's bow-hough'd, she's hem-shin'd.
Ae limpin leg a hand-breed shorter;
She's twisted right,she's twisted left,
To balance fair an ilka quarter;
She has a hump upon her breast,
The twin o that upon her shouther:
Sic a wife as Willie had,
T wad na gie a button for her.
Auld baudrons by the ingle sits,
An wi her loof her face a-washin;
But Willie's wife is nae sae trig,
She dights her frunzie wi a husion;
Her walie neives like midden-creels,
Her face wad fyle the Logan Water:
Sic a wife as Willie had,
I wad na gie a button for her